БАГА АНГИЙН ЗАЛУУ БАГШ НАР УР ЧАДВАРАА СОРИЛОО
Монгол улсын зөвлөх сургалтын менежер, ахмад багш Х.Нарантуяагийн нэрэмжит ерөнхий боловсролын сургуулийн 1-4 дэх жилдээ ажиллаж байгаа бага ангийн багш нарын “Мэдлэгээ ур чадвар болгоё” арга зүй, ур чадвараа сайжруулж харилцан туршлага солилцох үйл ажиллагаа 11 дүгээр сарын 27-29-ний өдрүүдэд Арвайхээр суманд зохион байгуулагдлаа.
Тус үйл ажиллагаа 2 үе шаттай зохион байгуулагдсан бөгөөд эхний шатанд ерөнхий боловсролын 34 сургуулийн 38 залуу багш 3 хэсэгт хуваагдан, тус бүр 90 минутын хугацаанд, 2 дахь шатанд хэсэг бүрээс шалгарсан 6 залуу багш Арвайхээр сумын ерөнхий боловсролын 1, 2, 4 дүгээр сургуулийн 1-5 дугаар ангид монгол хэлний ээлжит хичээлийг бэлтгэн заалаа.
Шалгарсан 6 хичээлийг бага боловсролын сургалтын менежерүүд болон үйл ажиллагаанд оролцогч 50 гаруй багшид нээлттэй зохион байгуулж, туршлага солилцлоо.
Багш нарын хичээлийг оноожуулж тэргүүн байрт Хархорин сумын ерөнхий боловсролын 2-р сургуулийн багш П.Дуламсүрэн, дэд байрт Арвайхээр сумын ерөнхий боловсролын Тэмүүлэл-Эрдэм сургуулийн багш Б.Лхагвасүрэн, гутгаар байрт Арвайхээр сумын ерөнхий боловсролын 1 дүгээр сургуулийн багш Б.Энхзаяа, тусгай байрт Хархорин сумын ерөнхий боловсролын Номын хүрдэн сургуулийн багш Н.Анхцэцэг, Арвайхээр сумын ерөнхий боловсролын 2 дугаар сургуулийн багш П.Оюунжаргал, Баян-Өндөр сумын ерөнхий боловсролын сургуулийн багш Д.Эрдэнэзул нарыг өргөмжлөл, мөнгөн шагналаар шагнаж урамшууллаа.
Залуу багш нарын хөгжих, мэдлэг чадвараа дээшлүүлэхэд хувь нэмэр оруулж энэхүү үйл ажиллагааг санаачлан, санхүүжүүлсэн МУ-ын зөвлөх менежер, ахмад багш Х.Нарантуяа, хамтран ажилласан МУ-ын зөвлөх сургалтын менежер Ц.Тогоосүрэн, Ё.Батцэцэг, харилцан туршлага судалж, өөрийгөө хөгжүүлж, шавь нараа сургах, төлөвшүүлэх үйлсэд өөрийн мэдлэг, ур чадвараа дайчлан ажиллаж байгаа залуу багш нар, үйл ажиллагааг зохион байгуулахад анги танхим, техник хэрэгсэл, интернэт орчныг бэлтгэж, хамтран зохион байгуулсан Арвайхээр сумын 1, 2, 4 дүгээр сургуулийн захирал, сургалтын менежерүүд, залуу багш нарынхаа багшлах эв дүй, заах арга зүй, онолын мэдлэгийг дээшлүүлж, тогтмол дэмжиж, зөвлөн чиглүүлж байгаа бага боловсрол хариуцсан сургалтын менежерүүддээ талархал илэрхийлж, цаашдын ажилд нь амжилт хүсье.
